Tuesday, February 02, 2010

ஹெச்.ஜி. ரசூல் திண்ணையில் எழுதிய “சூரியனும் சந்திரனும்” பற்றி

ஹெச்.ஜி. ரசூல் திண்ணையில் எழுதிய “சூரியனும் சந்திரனும்” பற்றி

ஹெச். ஜி. ரசூல் அவர்களின், “சூரியனும் சந்திரனும்” எனும் கட்டுரையைத் திண்ணை இணையதளத்தில் வாசித்தேன் (http://www.thinnai.com/?module=displaystory&story_id=21001281&format=html).

முதலில் ஒரு திருத்தம்:

அதில் அவர் கடைசியாக, “அல்லா பாலினம் கடந்த சொல் என்பது குறித்தும் உயர்மரபு சூரியன் என்பதால் மொழியியல் அடிப்படையில் அல்லா என்ற சொல் ஆண்பாலின அடையாளமாக குறிப்பிடப்படுகிறது என்பது குறித்ததுமான வரையறைகள் இன்னும் புது தெளிவுகளுக்காய் மறுவிவாதத்திற்கு உட்படுகின்றன” என்று எழுதி முடித்திருந்தார். இதில் “சூரியன்” என்ற வார்த்தையை நுழைத்திருப்பதால் அவர் என்ன சொல்லவருகிறார் என்பது விளங்கவில்லை. ஒரு சமயம் அவர் தவறுதலாக, தட்டச்சுப் பிழையாக, வேறு ஏதோ ஒரு வாக்கியத்தினை எழுத எத்தணித்து “சூரியன்” என்று எழுதிவிட்டு, பின்பு அதற்கு மாறாக மற்றொரு வாக்கியத்தினை எழுத நினைத்து, அவ்வாறு எழுதியும் விட்டு, பின்பு “சூரியன்” என்ற வார்த்தையினை அழிக்க மறந்துவிட்டார் எனக் கொள்வோம். எனவே, அர்த்தமே வராமல் உள்ள அவரது பிழையுள்ள வாக்கியம், நான் கீழே கொடுத்துள்ளவாறு, இதுவாகத்தான் இருக்கும் என நினைக்கிறேன்:

“அல்லா பாலினம் கடந்த சொல் என்பது குறித்தும், உயர்மரபு என்பதால் மொழியியல் அடிப்படையில் அல்லா என்ற சொல் ஆண்பாலின அடையாளமாக குறிப்பிடப்படுகிறது என்பது குறித்ததுமான வரையறைகள் இன்னும் புது தெளிவுகளுக்காய் மறுவிவாதத்திற்கு உட்படுகின்றன”.

அதாவது அவரது வாக்கியத்தில், “சூரியன்” என்ற சொல்லை மட்டும் எடுத்துவிட்ட பிறகு அவர் என்ன சொல்லவருகிறார் என அறியமுடிகிறது.

இப்போது எனது விமர்சனம்:

ஹெச். ஜி. ரசூல், தனது கட்டுரையில் கொடுத்துள்ள விவரங்கள் அடிப்படையில், “ ‘அல்லா’ எனும் சொல் ‘பாலினம் கடந்த சொல்’ எனும் வரையறை இன்னும் புது தெளிவுக்காய் மறுவிவாதத்திற்கு உட்படுகின்றது” என்ற அவரது கடைசி வாக்கியத்தின் ஒரு பகுதிக்கு உடன்படும் வகையில் குறிப்புகள் உள்ளன.

ஆனால், அவரது கடைசி வாக்கியத்தின் மற்றொரு பகுதியான, “, உயர்மரபு என்பதால் மொழியியல் அடிப்படையில் அல்லா என்ற சொல் ஆண்பாலின அடையாளமாக குறிப்பிடப்படுகிறது என்பது குறித்த வரையறை இன்னும் புது தெளிவுக்காய் மறுவிவாதத்திற்கு உட்படுகின்றது” என்பதினை முடிவு செய்யும் வகையில் அவரது கட்டுரையில் ஏதுமே காணப்படவில்லையே !

அரபு மொழியில், பால் சாரா உயர்திணைச் சொல் இல்லாததால், “ஆண்” எனும் பால் கொண்ட உயர்திணைச் சொல் பயன்படுத்தப்படுவதாக அம்மொழி அறிந்தவர்கள் கூறுகின்றனர். “அவன்”, “செய்தான்” என்று ஆண்பால் சொற்களே பயன்படுத்தப் பட்டுள்ளன. இந்த நிலை அரபி மொழிமட்டுமின்றி, அநேக மொழிகளிலும் இதுதான் நிலை.

அவரது கட்டுரையில் இரு வித பொருள்-நடைகள் உள்ளன. சந்திரன் அரபி இலக்கியத்தின் படி ஆண்பால் என்பதால், அல்லாஹ் ஆண்பால் என்று வாதிடும், அல்லது வாதிடுபவரின் வாதத்தினை முன்வைக்கும் ஹெச். ஜி. ரசூல், சந்திரனைத் தான் அல்லாஹ் என்று இஸ்லாம் கூறுகிறதா எனக் கூறவில்லையே ! இருப்பினும், சந்திரனைத்தான் முஸ்லீம்கள் அல்லாஹ் என்று கூறுவதாக மறைமுகமாக ஒரு வாதத்தினை முன் வைத்துள்ளார். சந்திரனை அல்லாஹ் என்று முஸ்லிம்கள் கருதுவதால் தான், பிறைச்சந்திரன் முஸ்லீம்களின் அடையாளமாகிவிட்டது எனக் கூறுகிறார். அல்லது அவ்வாறு கூறுபவரின் வாதத்தினை முன்வைத்து, ஹெச். ஜி. ரசூல், “ உயர்மரபு என்பதால் மொழியியல் அடிப்படையில் அல்லா என்ற சொல் ஆண்பாலின அடையாளமாக குறிப்பிடப்படுகிறது என்பது குறித்த வரையறை இன்னும் புது தெளிவுக்காய் மறுவிவாதத்திற்கு உட்படுகின்றது” என்று கூறுகிறார்.

“அல் – இலாஹ்”, அதாவது, “கடவுள்” என்ற சொல்லை சில அரபுக்கள் சந்திரனுக்கும் பயன்படுத்துகின்றனர். அனுமாருக்கும் பிள்ளையாருக்கும் கூட அவர்களது நம்பிக்கையைப் பொருத்து பயன்படுத்திக்கொள்ளலாம். இதற்காக இஸ்லாம் கூறும் கடவுள் “இதுதான்” “இத்தகையதுதான்” “பிள்ளையார்தான்”, “அனுமார்தான்” அல்லது “சந்திரன்தான்” என யாராலும் கூறமுடியுமா ? இதற்காக ஹெச். ஜி. ரசூல், “ உயர்மரபு என்பதால் மொழியியல் அடிப்படையில் அல்லா என்ற சொல் ஆண்பாலின அடையாளமாக குறிப்பிடப்படுகிறது என்பது குறித்த வரையறை இன்னும் புது தெளிவுக்காய் மறுவிவாதத்திற்கு உட்படுகின்றது” என்று கூறுவதற்கு தேவையென்னவென்று தெரியவில்லை.

இஸ்லாம் கூறும் இறை ஆண்பால், பெண்பாலுக்கு அப்பாற்பட்டது என்பதினை, இஸ்லாத்தின் நூலான குர்ஆன் மூலமாகவே அறியலாம்:
“அவனைப் போன்று எதுவும் இல்லை” – குர்ஆன் 112:4

இறைவன் எப்படியிருப்பான் என இஸ்லாமிய கண்ணோட்டத்தில் கூறவேண்டுமானால், சிறந்த வழி, நாம் பார்ப்பதெல்லாவற்றையும் இறைவன் இல்லை என்பதுதான். சந்திரனைப் பார்த்து “அதுவும் இறைவனில்லை” என்றால் அது ஒருவகையான விளக்கம். குர்ஆன் இதனை மிக வெளிப்படையாகவேக் கூறுகிறது:

“சூரியனையும் சந்திரனையும் வணங்காதீர்கள்; நீங்கள் கடவுளை வணங்குபவர்களாக வேண்டுமெனில் அவைகளைப் படைத்தவனை வணங்குங்கள்” – குர்ஆன் 41:37

No comments: